ཀ་ཕྲེང་སྡུག་བསྔལ་ལས་གྲོལ་བའི་བསླབ་བྱ།།

发布时间：2022-08-31 来源：日喀则藏康医院

༼ ཀ་ཕྲེང་སྡུག་བསྔལ་ལས་གྲོལ་བའི་བསླབ་བྱ།། ༽

༄༅། ། ནད་ཀྱི་སྡུག་བསྔལ་སེལ་ཐབས་སྟོན་པའི་བཀའ་སློབ་འདི་ནི་བདག་ལ་བཀའ་དྲིན་གཞལ་དུ་མེད་པའི་སློབ་དཔོན་རྡོ་རྗེ་གཡུལ་རྒྱལ་མཆོག་ནས་ཕྱག་བྲིས་གནང་།།

ཀ་རེ་ཀོ་རེ་ཁྲོམ་སྲང་ཉུལ་དགོས་དེ་མེད་པར།།

ཁ་ཁུ་སིམ་མེར་ནང་མི་ལྷན་འཛོམས་ཀྱི་གོ་སྐབས།།

ག་བལྟས་དེ་སྔ་བྱུང་མྱོང་མེད་པ་ཞིག་ཡིན་པས།།

ང་ཁྱོད་མེད་པར་སྤྲོ་པོར་བཞུགས་ན་རང་ཨེ་དགའ།།

ཅ་སིང་ཆེན་པོའི་མི་འཛོམས་རྒུ་འཛོམས་དེ་མེད་ལ།།

ཆ་ཡོད་ཆ་མེད་ཀུན་ལ་འགྲོགས་འདྲིས་ཡང་མེད་པར།།

ཇ་འཐུང་པགས་ཟ་མེས་པོའི་ཁ་ཟས་ལ་རོལ་བཞིན།།

ཉ་མོ་ཆུ་ལྟར་ཁྱིམ་མི་ལྷན་འཛོམས་དེ་ཨེ་དགའ།།

ཏ་རེ་ཏོ་རེ་སྲང་ལམ་ཉུལ་བགྲོད་དེ་སྤངས་ནས།།

ཐ་ངན་ནད་ལ་འགོག་སྲུང་ཚུལ་བཞིན་དུ་བྱས་ན།།

ད་ལྟ་ཅལ་སྒྲོག་ཛ་དྲག་ཆེ་ཆེ་རང་འདྲ་ཡང་།།

ན་ཚའི་སྒོ་ལྕགས་དམ་པོ་དེ་འདྲ་རང་ཨེ་ཡོད།།

པ་རི་པི་རི་ལྡེམ་ལྡེམ་འཁྱུག་འཁྱུག་གི་ན་བཞོན།།

ཕ་རོལ་ནད་ཀྱི་མིང་ཙམ་རྣ་བ་རུ་ཐོས་ཀྱང་།།

བ་བེར་སྡོད་ཚུགས་མེད་པ་རྡོ་ལེབ་ཀྱི་གྲོག་མ།།

མ་ལ་བུ་རྒོད་སྐྱེས་པའི་ངང་ཚུལ་དེ་ཨེ་ཡིན།།

ཙ་བ་ནད་འདི་འགོས་ཁྱབ་ཤིན་ཏུ་རང་ཆེ་ཡང་།།

ཚ་བ་ནད་དུག་ལུས་ལས་རིང་མིན་དུ་བྲལ་ཞིང་།།

ཛ་དྲག་ཉིན་མཚན་མི་འཁྱོལ་ན་ཟུག་ཀྱང་མེད་པས།།

ཝ་མོ་ལྟ་བུར་སྡར་ཞུམ་བྱེད་དགོས་རང་ཨེ་ཡོད།།

ཞ་ལུ་ལྟ་བུའི་ཉམ་ང་བཟོད་ཆུང་གི་ལུས་འདིར།།

ཟ་མ་བཟས་ཀྱང་དུག་གྱུར་འཆི་བ་རུ་མཐོང་ན།།

འ་ཅག་ལུས་ལ་འཆི་རྐྱེན་རླུང་འཚུབ་ལྟར་ཡོད་བཞིན།།

ཡ་མཚན་ནད་གཅིག་དམིགས་བཀར་སེམས་སྡུག་དེ་ཨེ་དགོས།།

རྭ་ལྟར་གྱོང་བའི་སེམས་འདི་འདུལ་ཐབས་ལ་མ་འབད།།

ལ་ཀླུང་བརྒལ་ནས་ན་རྒའི་སྡུག་བསྔལ་ལས་བྲོས་ཀྱང་།།

ཤ་ཁྲག་ཕུང་པོའི་ཁུར་འདི་འབྲལ་མེད་དུ་འབྲངས་བས།།

ས་གཞི་བརྒལ་ཡང་འདུ་བྱེད་སྡུག་བསྔལ་ལས་ཨེ་ཐར།།

ཧ་ལས་ཧོན་ཐོར་ཁ་གདང་མིག་བགྲད་དེ་བཞག་ནས།།

ཨ་ཧོ་ཕུང་པོའི་ཁུར་འདི་སྐྱུར་ན་རང་ཨེ་དགའ།།།།

༢༠༢༢ ལོའི་ ཟླ་༨ ཚེས་༣༠ཉིན།།